
Mediterranean
center: San Giovanni in Fiore
Florens
Abbey
Mediterranean
Architecture: Abbazia
Florense: Abside
Photography: by Giuseppe
DE MARCO, copyright
© 2003
'U cantu 'e ro 'migratu
E stasira io vuogliu cantare
e 'ssu cantu, l'affiru allu vientu
'ur è ccantu ma chissu è llamientu
ppe' lla Calabria ch'è ttantu luntana.
Calabria bbella, si' tterra r'amure,
è ttantu tiempu chi t'haju lassatu,
ti, lu juru, nun signu scordatu,
ogne jurnu te piensu re cchjù.
Ogner'ura ogne ssira, ogne nnotte
tiegnu 'ncore 'na malinconia,
ra Calabria la nostalgia
e ccuntu l'ure chi puozzu turna'!
Io tiegnu 'ncore 'nu fuocu cocente,
'ntr lu piettu cce tiegnu 'na fiamma,
Calabria bbella, si' ccuomu la mamma
chi lu nume nun se po' scurda'.
Tutte le notti me sùannu
ca tùarnu
allu paisiellu re supra li munti
e ccu' lli jìrita me fazzu li cunti
ma su sbagliati e num pùozzu turna'!
O Siela bbella, si' tutta 'nu 'ncantu,
cummegliata re faghi e dde pini,
si' 'ntricciata re ville e bbillini
paravisu re felicità.
Terra mia luntana luntana,
pienzu a ttio re matina a ssira
signu malatu: la capo me ggira
ccu' 'ssa pena 'um pùazzu campa'.
Cu' me vorra allu friscu assettare
sutta l'umbra 'e 'na frasca re pinu
e alla bbanna 'nu jascu re vinu
e nu' canalicchju chi facissi "glu glu"
Ccu' 'nna scenca 'e crapiettu arrustuta
o macaru cociutu a ttiella,
rrittu rrittu a 'nna calabrisella
ppe' potire 'sse pene scorda'!
Cu' 'na rìnnina vorra bbulare
ppe' ttornare alla mia primavera...
Si potissi, tornassi stasira
e 'ssu core facissi sana'.
Pasquale SPINA
Ricùardi, Calabria Letteraria
Editrice, 1989

Dialect Poetry: dedication from
Pasquale SPINA to Francesco Saverio ALESSIO in San Giovanni in Fiore, 1989
CALABRIAN CULTURE
Calabrian Roots

INTERNET
AND WEB EDUCATION DEPARTMENT